Po Ślonsku ło Gornym Ślonsku
Archiwalna publikacja z 2023-06-16.
Po Ślonsku ło Gornym Ślonsku ANCUG i WESTA Dwa ślonski słowa kere były piyrwyj i som do dzisiej wyznacznikym rychtig eleganckigo karlusa abo I żyniatego chopa a jak jeszcze do tego dodomy HUT , BINDER i wyglansowane szczewiki to jusz momy gotowego sztajfiyry -eleganta z kerym kożdo frela i kożdo baba na Gornym Ślonsku miała sie za coś pokozać miyndzy kamratkami keby sie poasić. Akurat dzisiaj już rzadko kto ubiera hut ale piyrwyj w czasach naszych opkow i omkow to niy było karlusa kery by szoł miyndzy ludzi tj na muzyka , zolyty, do szynku , roboty abo pograć w szkata z gołom głowom czyli bez czopki ze szyldkym abo huta . Jak by keryś był z gołom glowom to zaroz go kamraty mieli za jakigoś ablable abo kogoś nierychtig . Podobnie było z babami niy ważne czy wydane , stare abo młode frele kożdo jak kaj szła to musiała mieć coś na głowie hut abo jakoś chustka inacyj zaros by jom insze baby wziyny na jynzyki i narobiły gańby miyndzy ludziami . Skuli tego karlusy musieli przinajmnij roz abo i dwa razy na miesionc chodzić do golacza keby mieć włosy tak łoszcziżone keby nim hut pasowoł na głowie i sie niy kolyboł na wszystki strony i keby jeszcze włosy fajnie leżały na głowie . Baby miały z włosami wiyncyj łostudy bo je miały długie nikere asz do pasa i muisały je myć dość czysto a potym plyść i ukłodać na głowie w neclik abo jeszcze insze ukłodanki . Z tego co padajom stare fotografie to piyrwyj na Gornym Ślonsku kalrusy najbarzij chcieli mieć ancugi i westy we piski co było taki bardzo nowoczesne i na czasie tak jak chdzili łobleczyni we Berlinie padali zawsze nasze starziki . Padali jeszcze na Gornym Ślonsku tak : "Ancug ci dajom szyć jak sie żynisz i musi ci styknoć na cołki życi bo jak cie bydom chować to cie tysz go w niego łobleczom " . Możno i tak było u nikerych chopow ale praje kożdy chop na Gornym Ślonsku kery chodził do roboty i niy pił za czynsto to go stykło na wiyncyj ancugow i westow i biołych koszul do kerych ekstra były kragle kere sie łodpinało i ekstra mankety kere sie tysz łodpinało do pranio . Jak kery chcio być jusz ekstra sztajfiyrom to sie kupowoł kryczka -szpacyrsztok z kerom sie chodził po szpacyrze . Piyrwyj we Nidziela jak jeszcze niy padało to sztrasy Gornoślonskich miast były po połedniu pełne szpacyrujoncych ludkow tak babow ze chopami kerzi pomalutku kroczek po kroczku sie szli pod rynka i bajtlami kole nich kere tyrały miyndzy sztandami ze paskudami i roztomajtymi ciacidłami kerych było pełno porozpinanych tam kaj ludzie szpacyrowali . Bo w czasach Gornoślonskij Wielkoprzemysłwoej klasy Mieszczańskiej kożdego ślonzoka kery robił szychta w szychta , nimioł za dużo dzieci , nie pił gorzłołki na umor było stać sie gryfnie łoblyc siebie i swoja baba i dzieci ,a w nidziela sie iść dopołednia do kościoła a po połedniu na szpacyr tak że sie wcale niy musieli gańbować że som gorzij łobleczyni nisz baby , chopy abo bajlte łod Byamtrow lud Gornoślonski niy wyglondoł na niewolnikow jak insze robotniki kere dziepiyro pszijyżdżali na Gorny Ślonsk ze inszych landow za robotom .
